Te Kaahui Karohirohi

Te Kahui Karohirohi

Te ra 23 o Hoongoingoi 2008

Ka hoka he toroa a uta Ka hoka he toroa a Tai

Kokiri ki te whakarua. Koia..

Tuia a uta Tuia a Tai, Tuia he Karere Putuputu

Nau e te Po kaitauaa.

Tara tuu Tara rongo’Tara pewhe auake i te 

Aroaro o Uenuku. Noho

Te ihu, noho te kei Whiria He kaha tuatinitini..

 Whiria He kaha tuamanomano.. 

He koutu whenua e kore e taea te parepare,

He koutu tangata naa mate i papare’

 e taka atu ra, e taka atu ra, e taka nei.. 

Uira rarapa ake i raro, Ko te Ko winiwini,

Ko te Ko wanawana, Ko te hau o Tiitirua..

Whakamaua kia tina, Hui e, Taiki e ….

Noo te Rangi nei i kokiritia te tohu moo ‘Te Kahui Karohirohi’ 

i Waikowharawhara.. Koinei te Tohu ‘Bachelor Maatauranga

 Maori’ mai Te Waananga o Raukawa. Hei tuatahitanga teenei 

moo te mahi tahi a ngaa Waananga e rua nei, araa  a Aotearoa 

me Raukawa ki te whakawaatea tohu ki ngaa Kaumaatua / Kuia 

o Tauranga Moana  me Waikowharawhara..

Neke atu i te 50 ngaa kaumaatua i tau mai ki Waikowharawhara ki te 

Kokiritanga Araa ki te whakarongo koorero, ki te whakauru hoki ki 

ngaa raarangi ingoa, akoranga a Te Waananga o Raukawa. 

Ko Pakake Winiata  me tana roopu, tokorima  mai Raukawa.

  A  Marama Furlong mai Tauranga Moana  a  maatou  te Roopu o 

Te Arataki Manu Koorero ki Waikowharawhara, i whai waahi ai ki teenei 

hui nui a eenei  o a taatou Waananga 

E ai ki ngaa whakahau mai a o taatou Pouhere/Tumuaki ‘Kia whakatinanahia

 te Kaupapa’ Naa raaua te kii. Naa taatou i whakatutuki, i whakatinana, i whakatere. 

Ka oti ai..

 I whai taonga ai taatou hei rapunga  ma o taatou iwi, hei whakapakari i a taatou 

paepae marae hei tootikanga moo te hunga e tupu ake nei a taatou tamariki a 

taatou mokopuna, hei kanohi moo apopo…

Ko te wawata, hei timatanga, me whakauru mai rima tekau Kaumaatua / Kuia, 

hei para i te huarahi.  Tootika kau ana te haere a teenei roopu, ka whakanoho atu    

ai te roopu tuarua .. 

Ko te waahi akonga e koorerotia ana i teenei waa ko Waikowharawhara….

I teenei waa ka tuku mihi ki ngaa Mataamua o ngaa Wananga e Rua,  o Raukawa 

me Aotearoa, e kaha rawa nei raatou ki te tautoko mai i a taatou mahi  ki ngaa 

Kaiwhakarite putea, ki ngaa ringaringa raupaa, a tae noa hoki ki a taatou Pakeke, 

raurangatira ma, teenaa rawa atu koutou….

‘Kia hora te marino kia whakapapa pounamu te moana

Kia tere te Karohirohi i ou haerenga, i ngaa waa katoa’

 Dr Tui Adams

Copyright