Hitori
Te Arataki Manu Koorero o Tainui: 2006 He Kaupapa Whakapakari i Ngaa Paepae o Tainui
“Maaku anoo e hanga i tooku nei whare. Ko ngaa poupou he mahoe, he patate. Ko te tahuhu he hinau. Me whakatupu ki te hua o te rengarenga. Me whakapakari ki te hua o te kawariki.” Tawhiao
Mo ngaa tau maha, ko te awangawanga nui i tatuu ki runga i ngaa Maatamua o Te Waananga o Aotearoa, ko teeraa kua mimiti haere ngaa Paepae o Tainui. Ngaa mea e tiaki ana i ngaa marae, e rapu no ana, u a raatou, e taea hoki te peewhea. I na koinei ngaa kitenga a ngaa tini o Waananga i tu ki te whiriwhiri i teenei take.
I teetehi Rangi, e hoki mai ana au i Te Nehenehenui, i tupono noa iho taku pekanga atu ki te kaainga o Rongo Wetere i Te Awamutu, i rongo ake hoki e mauiui tiaana. Heoi anoo ka mihi maaua ki a maaua anoo, naa wai a ka huri a maaua koorero, ki te ahua a o taatou marae, ana te aahua hoki, e tino angiangi nei ngaa paepae o Tainui.
Ka paatai mai nei a Rongo, mehemea ka taea e au te ako i eetehi o a taatou Kaumaatua ki ngaa tikanga o Tainui, kia tika ai te whakatakoto koorero. Kia tu pakari ai raatou i runga i o taatou Marae maha, kia ahei raatou ki te manaaki i te hunga e tupu ake ana. Ka whakaae tonu atu au. E mahara tonu ana ki taaku hoa, e okioki mai ana i runga i te whariki, e mate ana te tuaraa. Kua horaina mai he pepa, e tuhi ana i ngaa mea hei whakauru atu ki te kaupapa nei. He waa roa maaua e koorero ana i konaa. Ko au e koorero ana, ko taku hoa e tuhi ana. Ka mutu ka wehe mai au, ka aahua wareware ki a maaua mahi o taua raa.
Noo te tau 2003 ka horaina e te Waananga te Kaupapa rongoaa hei whakaora mai anoo i te maatauranga me te moohiotanga ki ngaa Paepae o Tainui. Ka tautokohia mai hoki e te Arikinui, ka tatuu, ma Te Waananga o Aotearoa ki Rahui Pokeka hei kokiri. Naa Ngapare Hopa i tuhi te marautanga, ka whakaaetia mai hoki e te Poari o te Waananga.
Koina ra te waa i timata ai te Kaupapa ako, Te Arataki Manu Koorero o Tainui. Na maatou anoo i tohu ko wai maa ngaa pakeke hei kokiri i te kaupapa nei. Ko te hui tuatahi i tu ki Waitomo i roto o Ngaati Uekaha, ki Maniapoto neke atu i te 40 ngaa kaumaatua i reira noo Waikato, Hauraki, Raukawa me Maniapoto hoki. Ko ngaa take i horaina mai hei ako i te tau tuatahi ko ngaa kaupapa e pa ana ki te Kiingitanga, araa te whakatuu Kiingi tuatahi, ngaa Kiingi katoa, tae mai ki teenei Rangi. Waikato ngaa kaitiaki, ngaa hereherenga ki ngaa Waka, Whaikoorero, Waiata, Moteatea, Kawa Marae, Tuupuna Whare, Karakia.
Naa koinei te nuinga o ngaa mahi, ko te tino kaupapa ko te whakapakari i ngaa Paepae o Tainui, ki te whakamaatautau i a maatou anoo ki ngaa whakahau mai a ngaa Tuupuna e pa ana ki te Kaitiakitanga. Kia kauaa rawa e ngaro. Kia tu mataara tonu ai taatou o te Waka Tainui, i runga i o taatou Marae maha i ngaa wa katoa.
E noho ana i teenei waa, neke atu i te 400 ngaa Kuia, Koroua hoki, kua puta i eenei akoranga. Ka tae ki te tangihanga moo Te Arikinui, atu hoki ki te wa i whakawahii ai tana tama a Tuheitia hei Kiingi, kihaii arikarika te Ihi, te Wehi, te Tapu o ngaa paepae o Turangawaewae.
Hei oranga ngakau te nuinga o raatou, Mokau ki runga, Tamaki ki raro, Mangatoatoa ki waenganui, Pare Hauraki, Pare Waikato, te Kaokaoroa o Paatetere, tae noa ki te Waiariki, i ako i Te Arataki Manu Koorero.
“Kia hora te marino, kia whakapapa pounamu te moana, kia tere ai te karohirohi i mua tonu i o koutou huarahi” Rangawhenua Ngaati Pahere
©Dr Tui Adams, QSO Maniapoto
Page last updated 21 May 2008
