Te rohe o Mataatua
Te Rohe o Mataatua Na Turiokahu White Ka timata mai i Matata ki te puaha o te awa o te Atua, te matatatanga o te waka o Mataatua. Ka whakaraka tonu i te taha tika ki Whakatane, "Kia whakatane au i ahau". Ka hikoitia te au ki Ohiwa e ko te Upokorehe nga uri o te iwi Maroa. Tawhai atu ki Opotiki kia kite uretoa au I a te Whakatohea. Ka miri au I te patatai ki Torere he piko he taniwha na Ngai Tai wehi a te tahae. Wharuatia nga koko taunga ika taunga mataitai a te Whanau a Apanui atu I Hawai ki Whangaparaoa. Pikitia heketia nga Matua iwi ki Potaka weherua I nga uri a Porourangi a Tukaki. Ka huri te aroaro ki te raki, ko nga uri hunga a Hinepukohurangi, ki manawaru ki huiarau ki Ruatahuna. Whakauru te haere ki te ururakau e Ko Te Whaiti nui a Toi. Heke tonu i te Horomanga ki Tawhiuau ko Patuheuheu, ko Ngati Haka ki te mania ko te ika whenua e takoto nei. Ka tu au ki runga o Putauaki ki te kawenga o nga rau o Tanemahuta. Ka hoki nei au ki te Manukatutahi ki te moana o Toi kai rakau Toi te Huatahi tama ki te Hikurangi Ka titiro atu ki Mautohora i whiua ai te korero waiho ma te whakamaa e patu. Ka huri te titiro ki te raki ki Te Kurae o te ihu o Tamatekapua. Mai I te ihu ki te takere nui o te waka ki Tongariro ko Te Arawa te iwi e. Whakapii tonu te haere ko Kaituna ki Tapuika a Tia Waitaha a Hei Ka ahu te titiro ki runga o Mauao ki te Tauranga mai o nga waka Rangatra Tauranga tangata Tauranga Moana Mai nga kuri a Wharei ki tihirau e tu ana au I runga I te mauri o toku waka o Mataatua, ki te poho o toku tipuna a Irakewa e tu whakahirahira mai nei. Ko Hau, ko Nuiho, ko Manu, ko Weka, ko Toroa, ko Ruaihona, ko Te Tahinga o te ra, ko Awanuiarangi, ko Rongotangiawa, ko Irapeke, Ko Awatope ka puta ko Tawhaki o te Rangi
Page last updated 22 Nov 2007
